Бібліяноч з беларускім каларытам прайшла ў абласной бібліятэцы імя Леніна
Чарговая доўгачаканая сустрэча гамяльчан і гасцей горада з прыгодамі адбылася ў сценах Гомельскай абласной бібліятэкі імя У. І. Леніна ў традыцыйную «Ноч у бібліятэцы-2017». У гэтым годзе яна была прысвечана беларускай культуры і атрымала назву «Вераснёвыя светлыя мары».
З парога гледачы і ўдзельнікі вясёлых мерапрыемстваў адправіліся ў падарожжа з Францыскам Скарынай. У Музеі рэдкай кнігі бібліятэкі ладзілася інтэрактыўная гульня з элементамі тэатралізацыі, а таксама была прадстаўлена кніжная выстава да 500-годдзя беларускага кнігадрукавання «Выложена працею і вытиснена повелением». Жывы інтарэс выклікала і выстава галаўных убораў народаў свету.
Наведвальнікаў бібліяночы чакаў літаратурна-музычны салон, дзе для меламанаў гучалі песні гурта «Сімулякросс». Тут жа гледачы з задавальненнем пелі вядомыя песні ў караоке. Для самых маленькіх гасцей працавала інтэрактыўная пляцоўка «Разам з Феяй Усмешкай», дзе праводзіла гульні Таццяна Крыцкая ў праекце «Альтанка для чытанкі».
На другім паверсе бібліятэкі Леніна была паказана гісторыя культуры і традыцый Беларусі. Гледачы, якія зайшлі на фальклорную пляцоўку «Таямнічыя сцежкі кахання», з жывой цікавасцю сачылі за тэатралізаваным абрадам «Вяселле». Свае сцэнкі прадстаўлялі студэнты ГДУ імя Ф. Скарыны. Але ж асаблівае вяселле пачалося, калі кіраўнік школкі народнага танца Пятро Цалка вучыў кожнага жадаючага танчыць беларускія народныя танцы пад вясельныя спевы.
– Я з сяброўкай упершыню прыйшла на «Ноч у бібліятэцы», – падзялілася ўражаннямі Марыя Сівакова, – але я і не чакала, што тут можа быць так весела. Дзякую арганізатарам за магчымасць убачыць многа цікавых людзей і дакрануцца да роднай культуры. Для наведвальнікаў працавала карчма «Ля Парнаса». На добрую памяць можна было набыць сабе вырабы з саломкі, лазы, дрэва ці воўны ў майстэрні «Дзед Васіль запрашае». Мноства палескіх абярэгаў, рукатворных кніг, майстар-класаў і многае іншае чакала ўсіх зацікаўленых гледачоў. Сапраўдную асалоду для вачэй падарыла выстава фотаздымкаў Алены Коцур-Кацяк.
Трэці паверх бібліятэкі – для самых цярплівых і вынослівых. Тут раскінуўся «Літаратурны панадворак», а таксама прайшла акцыя «Адрадзім рушнік разам!» Сакрэтамі беларускіх традыцый дзяліўся з усімі жадаючымі майстар Любамір. А тым часам у актавай зале ладзіўся спектакль «Чорная панна Нясвіжа» у выкананні народнага аматарскага тэатра «Гракі» абласной бібліятэкі. У бібліятэчным двары адбылося аўдыё-візуальнае падарожжа ў свет літар і шрыфтоў. «Ноч у бібліятэцы-2017» стала яркай зоркай на небасхіле культурнага жыцця Гомеля і падаравала гамяльчанам самыя незабыўныя ўражанні.
Автор фото: Наталья Мбакпуо